تیڈا چہلم سمجھ کے قبر اُتے میں ویرنڑ کرنڑ دعا آئی ہاں
اٹھی مل گھن بھینڑ مسافرہ کوں میں شام دی قید نبھا آئی ہاں
بازار ڈٹھے دربار ڈٹھے جھڑکاں جھلیم نروار ڈتے
جتھ جتھ گئی ہاں تیڈے نام کولوں باغی دا لفظ مٹا آئی ہاں
نہ بھلسی پند بازاراں دا اَتے ٹرنا پردہ داراں دا
پڑھ خطبے حیدری لہجے وچ میں حق باطل سمجھا آئی ہاں
کیا ظلم ڈساں بے دیناں دا نہیں ملیا کفن سکینہ ؑدا
تائیں شام دے وچ تیڈی چھوٹی دھی ہک چولے وچ دفنا آئی ہاں
تئیں کربل وچ آرام کیتا تیڈی بھینڑ نے مشن تمام کیتا
پرچم تیڈی مظلومی دا وچ شام دے نصب کرا آئی ہاں