تعصب اور حسد
یہ یاد رکھنا چاہیے کہ تعصب اور حسد دو الگ الگ بیماریوں ہیں حسد یہ ہے کہ کسی
انسان پر اللہ کی نعمت دیکھ کر جلتے رہنا اور پھر عملی طور پر اس سے زوال نعمت کی
کوشش کرنا اور تعصب یہ ہے کہ کسی انسان پر خدا کی نعمت کو دیکھے اور اس نعمت کی
تحقیر کرے اور صاحب نعمت سے ان لوگوں کو ترجیح دے جو اس نعمت سے بے بہرہ ہوں مثلاً
جاہل ہونے کے باجود کسی عالم کے متعلق یہ کہے کہے کہ میں اس سے زیادہ عاالم ہوں
اسی طرح اپنے سے زیادہ علم رکھنے والے کی تحقیر کرے اور کہے کہ میں اس سے بد رجہا
بتہر ہوں بلکہ وہ تو میرے شاگردوں کی حیثیت بھی نہیں رکھتا یا یہ کہ دوسری قوم کے
عالم سے اپنی قوم کے جاہل کو ترجیح دے اور میں صرف صفت علم کا ذکر کر دیا ہے ورنہ
تعصب صرف علم سے مخصوص نہیں بلکہ کسی کی اچھی صفت کی تحقیر کرنا اور اس صفت سے
خالی لوگوں کو اس سے بڑھانا تعصب کہلاتا ہے یعنی دوسری اقوام کے شرفاء سے اپنی قوم
کے غیر شریف افراد کو افضل کہنا یہ تعصب
ہی کی بدولت ہوا کرتا ہے اور تعصب چونکہ عصبہ سے ہے اور اس کے مفہوم میں کنبہ
پرستی خاندان نوازی اور قوم پروری داخل ہے لہذا تعصب اپنے لئے یا اپنں کے لئے ہی
ہوا کرتا ہے کہ انسان کسی بھی باکمال شخص کو اپنے جیسا یا اپنی قوم و کنبہ و
خاندان جیسا نہ سمجھے اور جس طرح غیظ و غضب تکبر کی پیداوار ہے اسی طرحتعصب بھی
تکبر ہی کی پیداوار ہے اور یہ موذی مرض چونکہ عربوں میں عام تھا حتی کہ اپنی فصاحت
و بلاغت پر اتراتے ہوئے وہ پورے عالم کی تمام اقوام کو عجم یعنی گونگا تصور کرتے
تھے اور کسی غیر عرب کو عرب پر ترجیح دینا نا جائز سمجھتے تھے پس اگر غیر عرب عالم
و کامل ہوتا اور عرب شخص جاہل و ناقص ہوتا تب بھی وہ عرب کو غیر عرب پر ترجیح دیتے
تھے ان کی اسی عمومی عادت بد کے پیش نظر تعصب کی عرب کی طرف نسبت دی گئی ورنہ تعصب
بڑی صفت ہے خواہ کسی قوم میں پایا جائے حضرت امام جعفر صادق علیہ السلام سے منقول
ہے کہ جناب رسالتمابؐ نے فرمایا من کان فی لبہ حبۃ من خر دل من عصبیۃ بعثہ اللہ
یوم القیمۃ مع اعراب الجاھلیۃ یعنی جس انسان کے دل میں ایک رائی کے دانے کے برابر
بھی تعصب ہو گا اس کو خدا بروز قیامت زبان جاہلیت کے عربوں (بدؤوں) کے ساتھ محشور کرے
گا اور حسد کے لئے ضروری نہیں کہ قوم کے لئے ہو یا اپنی ذات کے لئے ہو بلکہ یہ موذی
روحانی مرض دوسروں پر اللہ کی نعمت کو دیکھ کر پیدا ہوتا ہے اور اس کی نعمت کی
تحقیر نہیں ہوتی بلکہ اس مرض میں اس کی نعمت زوال کی تمنا ہوتی ہے اور اس بیماری
کے ہوتے ہوئے دل میں خواہش ہوتی ہے کہ فلاں شخص (محسود) کی نعمت اس سے زائل ہو
جائے خواہ وہ نعمت یا اس جیسی نعمت مجھے ملے یا نہ ملے اور جب بھی اس شخص سے نعمت
مذکورہ کے زوال کی خبر سنے یا زوال کے اسباب دیکھے تو دل میں خوشی محسوس ہو اور یہ
بد ترین روحانی بیماری ہے اور یہ بیماری غیروں کی بہ نسبت اپنوں میں زیادہ ہوتی ہے
جس طرح کہ تعصب غیروں میں ہی ہوا کرتا ہے پس اپنے خاندان کے کسی فرد کو فراوانی
نعمت میں سرشار دیکھ کر خاندان کے ہی گھٹیا قسم کے آدمی خواہش کرنے لگتے ہیں کہ اس
کی نعمت زائل ہو جائے اور پھر اس کی زوال نعمت پر خوشی بھی محسوس کرتے ہیں اور
میرے خیال میں بڑا نیک بخت اور نیک نصیب ہے وہ انسان جو فراوانی نعمت خدا کے
باوجود اپنی قوم و خاندان کے حسد سے محفوظ رہے اور تاریخ شاہد ہے کہ حضرت
رسالتمابؐ اپنی قوم قریش کے حاسدین سے زخم خوردہ ہو کر دنیا سے تشریف لے گئے اور
حضرت امیر المومنین علیہ السلام اور ان کی اولاد امجاد پہلے قریشیوں اور پھر عباسیوں کے جور و ظلم کا
نشانہ صرف حسد ہی کی بدولت بنتی رہی اور بہت ہی نیک بخت ہے وہ انسان جو اپنے اندر
حسد یا تعصب جیسے موذی روحانی امراض کو محسوس کرلے اور اس سے تائب ہو جائے